Gəncəli şəhid Elnur Məmmədovun oğlu Vahid Məmmədov tələbə adını qazanıb.
Gencexeber.az məlumat verir ki, atasının yolunu davam etdirmək və gələcəkdə hərbçi olmaq niyyətində olan gənc Heydər Əliyev adına Hərbi İnstituta qəbul olunub.
Qeyd edək ki, şəhid Elnur Məmmədov 21 oktyabr 1982-ci ildə Gəncə şəhərində anadan olub. Hərbi xidmətini başa vurduqdan sonra bir müddət Gəncədə çörəkçi işləyən Elnur 2014-cü ildən yenidən hərbi xidmətə başlayıb. O, müddətdən artıq həqiqi hərbi xidmət qulluqçusu kimi manqa komandiri vəzifəsində xidmət edib.
2020-ci il Vətən müharibəsi zamanı Murovdağın azad olunması uğrunda gedən döyüşlərdə qəhrəmancasına vuruşub. Döyüş tapşırığını yerinə yetirərkən yaralanan Elnur Məmmədov xəstəxanaya yerləşdirilib və 26 oktyabr 2020-ci ildə şəhidlik zirvəsinə ucalıb. O, oktyabrın 27-də Gəncə Şəhidlər Xiyabanında dəfn olunub.
Şəhidimiz ölümündən sonra "Vətən uğrunda", "Kəlbəcərin azad olunmasına görə" medalları, eləcə də 3-cü dərəcəli "Vətənə xidmətə görə" ordeni ilə təltif edilib.
Elnur Məmmədov ailəli idi. Şəhidimizin Vahid və Yusif adlı iki övladı yadigar qalıb. Bu gün isə onun oğlu Vahid Məmmədov hərbçi olmaq arzusu ilə Heydər Əliyev adına Hərbi İnstitutun tələbəsi adını qazanaraq atasının qəhrəmanlıq yolunu davam etdirmək üçün ilk addımını atıb.
