Gəncədə 25 yaşlı gənci 7 bıçaq zərbəsi ilə qətlə yetirməkdə təqsirləndirilən Murad Hacıyevin cinayət işinin bəzi detalları məlum olub.
İstintaqla müəyyən edilib ki, Murad Yusif oğlu Hacıyev 2026-ci il fevralın 2-də idarə etdiyi "Mercedes-Benz" markalı avtomobillə Gəncə şəhəri, Şahsevənlər küçəsində Röyal Məmmədovun sürdüyü VAZ-2107 avtomobilini saxlamasını tələb edib. Saat 23 radələrində M.Müşfiq küçəsində Röyal Məmmədovun avtomobilinin qarşısını kəsib.
Daha sonra Murad Röyalı yerə yıxaraq əl və ayaq zərbələri ilə üz nahiyəsinə zərbələr endirib. Murad üzərində olan ümumi təyinatlı turist bıçağı ilə Röyal Məmmədova alın nahiyəsinə, döş qəfəsinə və bədənin müxtəlif nahiyələrinə ümumilikdə 7 bıçaq zərbəsi vuraraq qətlə yetirib.
Murad Hacıyevə qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.
Qeyd edək ki, bu cinayət işi üzrə məhkəmə istintaqı Gəncə Ağır Cinayətlər Məhkəməsinin hakimi İlkin İbişovun sədrliyi ilə araşdırılır.
Xatırladaq ki, mərhum Röyal Məmmədov 44 günlük Vətən müharibəsinin iştirakçısı olub. Döyüşlərdəki şücaətinə görə medallarla təltif edilib.
Mənbə: unikal.аz
