Bu gün gəncəli şəhid Elnur Məmmədovun doğum günüdür.
Gencexeber.az xatırladır ki, Elnur Məmmədov 21 oktyabr 1982-ci ildə Gəncə şəhərində anadan olub.
1990-1993-cü illərdə Ağdam rayon 1 nömrəli tam orta məktəbdə təhsil alıb. 1993-2000-ci illərdə Gəncə şəhər 16 nömrəli tam orta məktəbdə, 2000-2004-cü illərdə Şuşa Kənd Təsərrüfatı Texnikumunda təhsilini davam etdirib. Hərbi xidməti bitirdikdən sonra 2005-2014-cü illərdə Gəncə şəhərində çörəkçi işləyib.
Elnur Məmmədov 2004-2005-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olub. 2016-cı ilin aprelin 2-dən 5-nə qədər davam edən Aprel döyüşləri zamanı Goranboy rayonunun Tap Qaraqoyunlu kəndi istiqamətində vuruşub.
2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi uğrunda gedən döyüşlərə qatılıb.
Murovdağ istiqamətində döyüş tapşırığını yerinə yetirərkən yaralanıb, 26 oktyabr 2020-ci ildə müalicə aldığı xəstəxanada şəhid olub. 27 oktyabr tarixində Gəncə Şəhidlər Xiyabanında dəfn olunub.
Elnur Məmmədov ölümündən sonra "Vətən uğrunda", "Kəlbəcərin azad olunmasına görə" medalları və 3-cü dərəcəli "Vətənə xidmətə görə" ordeni ilə təltif edilib.
