Şəmkir rayonunun Sabirkənd kəndində 1992-ci il təvəllüdlü Kəmalə İbrahimovaya ağır xəsarətlər yetirilməsi ilə bağlı araşdırma aparılır.
Gencexeber.az-a açıqlama verən Daxili İşlər Nazirliyinin (DİN) Mətbuat Xidmətinin regional qrupunun baş inspektoru Eşqin Qasımov bildirib ki, müraciətlə əlaqədar Şəmkir Rayon Polis Şöbəsində müvafiq ekspertiza təyin edilməklə araşdırma aparılır.
Onun sözlərinə görə, polis şübhəli şəxsin saxlanılması istiqamətində tədbirləri davam etdirir.
Qeyd edək ki, zərərçəkənin anası İlhamə Məmmədovanın iddiasına görə, hadisəni 1976-cı il təvəllüdlü Bəhruz İbrahimov törədib. O bildirib ki, qızının qaynı uzun müddətdir ondan uşaqları ilə birlikdə evdən çıxmasını tələb edir.
11:23
Şəmkir rayonunun Sabirkənd kəndində 1992-ci il təvəllüdlü Kəmalə İbrahimovanın qaynı tərəfindən döyüldüyü bildirilir.
Gencexeber.az-a müraciət edən zərərçəkənin anası İlhamə Məmmədovanın iddiasına görə, hadisəni 1976-cı il təvəllüdlü Bəhruz İbrahimov törədib.
Bildirilib ki, həmin şəxs Kəmaləyə arxadan yaxınlaşaraq qulaq nahiyəsinə yumruqla zərbə endirib, onu yerə yıxdıqdan sonra döyməyə davam edib. Daha sonra qadın minik avtomobili ilə yaşadığı evə aparılıb. İddialara görə, evdə qayınanasının və iki azyaşlı övladının gözü qarşısında ona yenidən çoxsaylı zərbələr endirilib.
Qadın kəllə-beyin travması alıb, burnu və üst çənə sümüyü sınıb. Həmçinin onun bir neçə qabırğasının sındığı, bədəninin müxtəlif nahiyələrində küt travmalar, çoxsaylı xəsarət və sıyrıqlar olduğu bildirilir.
Qadının həyat yoldaşı, 1971-ci il təvəllüdlü Sənan İbrahimov hadisə zamanı işlə əlaqədar Bakıda olub.
Hadisənin uzun müddətdir davam edən torpaq mübahisəsi zəminində baş verdiyi qeyd edilir. Məlumata görə, Bəhruz qardaşının ailəsi ilə birlikdə atalarından qalan məhəllədən köçməsini tələb edib. Halbuki hər iki qardaşın həmin ərazidə ayrı-ayrılıqda evləri var.
Qeyd edək ki, zərərçəkənin yaxınlarının bildirdiyinə görə hazırda hüquq-mühafizə orqanları tərəfindən hadisəni törətməkdə şübhəli bilinən Bəhruz İbrahimovun axtarışları davam etdirilir.
