Tarixi abidələrlə zəngin Tovuz rayonunun Yanıqlı kəndində yerləşən Şah Abbas məscidi tarixə qovuşmaq təhlükəsi ilə üz-üzədir.
Gencexeber.az məlumat verir ki, XVII əsrə aid olan tarixi tikili uzun müddətdir aşınmaya məruz qalır. Məscidin günbəzi uçub, istinad divarları isə tökülməyə davam edir. Abidənin hazırda bərpa və konservasiya işlərinə ciddi ehtiyacı var.
Sakinlərin sözlərinə görə, bir müddət əvvəl könüllülərin təşəbbüsü ilə ərazidə təmizlik işləri aparılıb. Lakin hazırda məscidin ərazisini yenidən kol-kos basıb.
Vətəndaşlar bildirir ki, tarixi irsimizin mühüm nümunələrindən olan bu abidənin tamamilə dağılmasının qarşısını almaq üçün təxirəsalınmaz tədbirlərin görülməsi vacibdir. Əks halda, əsrlərin yadigarı olan Şah Abbas məscidini itirmək təhlükəsi aradan qalxmayacaq.
