Gəncədən ətraf bölgələrə sərnişin daşınmasında, xüsusilə Samux rayonu istiqamətində ciddi problemlər yaşanır.
Gencexeber.az məlumat verir ki, istismar müddətini başa vurmuş nəqliyyat vasitələri sərnişinlər üçün çətinliklər yaradır. Yeni və müasir avtobuslara ehtiyac olsa da, bu istiqamətdə yenilənmə prosesi gözlənilən səviyyədə deyil.
Ən ciddi problemlərdən biri Gəncədən Samux rayonunun mərkəzinə və ətraf kəndlərə işləyən avtobuslarla bağlıdır. Gündəlik reyslər həyata keçirən nəqliyyat vasitələrinin bir qismi müasir tələblərə cavab vermir və texniki vəziyyəti ilə yanaşı, sərnişinlərə təqdim olunan xidmətin keyfiyyəti də narazılıq doğurur. Vətəndaşların sözlərinə görə, yay aylarında avtobuslarda kondisionerin, qışda isə istilik sisteminin olmaması səfərləri daha da çətinləşdirir.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, daşıyıcılara xəbərdarlıqlar edilib və istismar etdikləri marşrut xətləri üzrə avtobusların yenilənməsi barədə tapşırıqlar verilib.
Qurumdan qeyd olunub ki, bölgələrdə sərnişindaşıma xidmətinin keyfiyyətinin artırılması istiqamətində işlər davam etdirilir.
Lakin mövcud vəziyyət göstərir ki, avtobusların yenilənməsi ilə bağlı verilən tapşırıqlar hələ də bütün istiqamətlərdə gözlənilən nəticəni verməyib.
