Gəncə şəhərində sənaye sahəsində çalışan muzdlu işçilərin orta aylıq nominal əməkhaqqı 2025-ci ildə 789,4 manat təşkil edib.
Gencexeber.az-ın Dövlət Statistika Komitəsindən əldə etdiyi məlumata görə, Gəncədə sənaye işçilərinin orta aylıq nominal əməkhaqqı 2021-ci ildə 527,2 manat, 2022-ci ildə 608,6 manat, 2023-cü ildə 692,6 manat, 2024-cü ildə isə 718,4 manat olub.
Beləliklə, 2025-ci ildə göstərici əvvəlki illə müqayisədə 71 manat artıb. 2021-ci illə müqayisədə isə sənaye sahəsində çalışan işçilərin orta aylıq nominal əməkhaqqı 262,2 manat yüksəlib.
Qadın işçilərin orta aylıq nominal əməkhaqqı 2025-ci ildə 557,4 manat təşkil edib. Bu göstərici 2021-ci ildə 348,1 manat, 2022-ci ildə 421,9 manat, 2023-cü ildə 479 manat, 2024-cü ildə isə 485,8 manat olub.
Qeyd edək ki, ölkə üzrə sənaye sahəsində çalışan işçilərin orta aylıq nominal əməkhaqqı 2025-ci ildə 1334,9 manat təşkil edib. Bu, Gəncə şəhəri üzrə göstəricidən 545,5 (41 faiz) manat çoxdur.
