Azərbaycanda kənd təsərrüfatı müəssisələrində yumurtanın istehsal maya dəyəri azalsa da, satışının rentabelliyi yüksəlib.
Dövlət Statistika Komitəsinin məlumatına əsasən, 2025-ci ildə müəssisələrdə min ədəd yumurtanın istehsal maya dəyəri 88,69 manat təşkil edib. Bu göstərici 2024-cü ildə 90,89 manat olub.
Beləliklə, min yumurtanın istehsal xərci bir ildə 2,20 manat və ya təxminən 2,4 faiz azalıb. Bir yumurtanın orta istehsal maya dəyəri isə təxminən 8,9 qəpik təşkil edib.
Eyni dövrdə yumurta satışının rentabelliyi 21,8 faizdən 42,6 faizə yüksəlib. Bu, 20,8 faiz bəndi artım deməkdir.
Qeyd edək ki, Azərbaycan mediasında yayılan məlumata görə, yumurtanın qiymətində artım qeydə alınıb. Belə ki, məhsulun bir ədədinin satış qiyməti orta hesabla 5–10 qəpik bahalaşıb.
Məlumat üçün bildirək ki, göstəricilər kənd təsərrüfatı müəssisələrinin fəaliyyətini əhatə edir. İstehsal maya dəyəri yumurtanın mağazalardakı satış qiymətini, rentabellik göstəricisi isə pərakəndə satıcıların qazancını ifadə etmir.
Mənbə: modern.аz
