Bu gün gəncəli şəhid İlqar Əhmədovun dünyaya gəldiyi gündür.
Gencexeber.az məlumat verir ki, İlqar Nəriman oğlu Əhmədov 1964-cü il oktyabrın 24-də Gəncə şəhərində anadan olub. O, 37 nömrəli orta məktəbdə təhsil alıb.
İlqar Əhmədov 6-cı sinifdə oxuyarkən anası Raya xanımı itirib. 1986-cı ildə hərbi xidmətdən qayıdanda isə atasının da vəfat etdiyini öyrənib. 1987-ci ildə ailə həyatı qurub.
1989-cu ildən etibarən 703 saylı hərbi hissənin tərkibində xidmət edən İlqar Əhmədov sərhəd bölgələrinin müdafiəsində iştirak edib. Hərbi xidmət zamanı göstərdiyi fəaliyyətə görə hərbi hissə komandiri tərəfindən dəfələrlə fəxri fərman və qiymətli hədiyyələrlə təltif olunub. O, əsgər yoldaşları arasında böyük hörmət qazanıb.
İlqar Əhmədov Çaykənd əməliyyatı zamanı dəfələrlə kəşfiyyata gedib. Heyvalı uğrunda döyüşlərdə göstərdiyi qəhrəmanlığa görə 703 saylı hərbi hissənin komandiri onun ailəsinə təşəkkürnamə məktubu göndərib.
İlqar Nəriman oğlu Əhmədov 1992-ci il avqustun 29-da ağır döyüşlərin birində şəhidlik zirvəsinə ucalıb.
Onun həyat yolu Vətənə sədaqətin, hərbi şücaətin və fədakarlığın nümunəsi kimi xatırlanır. Şəhidimizin əziz xatirəsi daim ehtiramla yad edilir.
