Gəncənin 5-ci mikrorayonunda, Üzeyir Hacıbəyli küçəsi, bina 5-in qarşısında mövcud vəziyyət sakinlərin narazılığına səbəb olub.
Gencexeber.az-a müraciət edən vətəndaşların sözlərinə görə, ərazidə kanalizasiya suları daşıb, asfalt örtüyü dağılıb və hər tərəf palçığa qərq olub.
Onlar bildirirlər ki, artıq 4 ildir sözügedən problemlə üzləşirlər. Kanalizasiya suları və palçıq səbəbindən uşaq arabası ilə hərəkət etmək, velosiped sürmək mümkün deyil. Ərazidə uşaqların oynaya biləcəyi hətta kiçik park da yoxdur, sakinlərin dincəlməsi üçün isə skamyalar yararsız vəziyyətdədir.
Şikayətçilər qeyd edirlər ki, şəhərin müxtəlif ərazilərində abadlıq işləri aparılsa da, sözügedən binanın qarşısındakı vəziyyət dəyişməz qalır.
Onlar aidiyyəti qurumlardan kanalizasiya probleminin aradan qaldırılmasını, asfalt örtüyünün bərpasını və ərazinin abadlaşdırılmasını xahiş edirlər.
