Azərbaycan Respublikasının Gənclər və İdman Nazirliyinin Strongman Federasiyasının yığma komandasının üzvü, Gəncə şəhərini təmsil edən idmançı Əli Əliyev növbəti uğura imza atıb.
Gencexeber.az-ın məlumatına görə, Əli Əliyev 110+ kiloqram çəki dərəcəsində Bakıda strogmen üzrə keçirilən yarışda çıxış edib. 1994-cü il təvəllüdlü idmançımız uğurla icra etdiyi iki hərəkətə görə birinciliyi qazanıb. İdmançı "Squat" (çömbəlmə) hərəkəti üzrə ümumilikdə 340 kiloqram çəki ram edərək mütləq çempion adına layiq görülüb. Ştanqı başı üzərinə birdəfəlik sıxma hərəkəti zamanı isə 145 kiloqram çəkinin öhdəsindən gələn gəncəli Azərbaycan rekordunu rəsmləşdirib.
Əli Əliyev Azərbaycan Strongman Federasiyasının rəhbəri Bəxtiyar Quliyev tərəfindən diplom və medallarla təltif edilib.
Qeyd edək ki, idmançımız üçqat dünya və ikiqat Avropa çempionudur. O, hazırda Gəncə şəhər Baş Polis İdarəsinin 1-ci Polis şöbəsinin Post Patrul Xidməti tağımında polis nəfəri işləyir.
