Gəncəli alim, Azərbaycan Respublikasının Elm üzrə Prezident mükafatı və Prezident təqaüdçüsü, İslam Ölkələri Beynəlxalq Elmlər Akademiyasının üzvü, "Ümumdünya Gənc Alimlər Forumu"nun vitse-prezidenti Elnur Həsənov beynəlxalq elmi bazalarda növbəti uğura imza atıb.
Gencexeber.az məlumat verir ki, Gəncə şəhərindən olan alim "International Hirsch Index" platformasının hesabatına əsasən, 0-40 yaş kateqoriyasında ictimai-humanitar elmlər üzrə beynəlxalq elmi bazalarda əsərlərinə ən çox istinad edilən azərbaycanlı alim olub.
Elnur Həsənov "Elmi İstinadda Rekord" diplomuna da layiq görülüb. Onun elmi əsərlərinə dünya alimləri tərəfindən 3270-dən çox istinad edilib.
Gənc alim dünyanın 98 ölkəsinin yüksək impakt faktorlu akademik nəşrlərində 540 elmi məqalə, tezis və kitab (monoqrafiya) çap etdirib. Onun müəllifi olduğu əsərlər "Web of Science", "Clarivate Analytics", "Scopus", "Elsevier", "Google Scholar" və digər beynəlxalq elmi-metodik bazalarda dərc olunub.
Elnur Həsənovun elmi əsərləri doğma dilimizlə yanaşı, 11 xarici dildə çap edilib. O, İsveç Kral Akademiyasının üzvü, İtaliya Elm Nəşriyyatları İttifaqının, Avstriyanın BOKU tədqiqat universitetinin, Yaponiyanın "Elm" cəmiyyətinin və Almaniyanın Frankfurt-Hote universitetinin fəxri üzvüdür.
Gənc alim Gəncə tarixinə dair arxiv sənədlərinin, şəhərin antropoloji, etnoqrafik və arxeoloji irsinin tədqiqi, həmçinin memarlıq abidələrinin öyrənilməsinə həsr olunan çoxsaylı elmi əsərlərin müəllifidir. O, ölkəmizdə və xaricdə bir sıra elmi qurumların mükafatlarına layiq görülüb.
