Qobustanın qayalarında min illər əvvəl yaşamış insanların ov və rəqs səhnələri qalıb. Bu təsvirlərin ilk arxeoloji tədqiqatına 1939-cu ildə gəncəli alim İshaq Cəfərzadə başlayıb.
Gencexeber.az məlumat verir ki, İshaq Cəfərzadə 1895-ci il avqustun 14-də Gəncədə sənətkar ailəsində dünyaya gəlib. Altı yaşında mədrəsədə oxumağa başlayıb, ərəb və fars dillərini öyrənib. Sonralar tarix və filologiya üzrə təhsil alıb, 1926-cı ildə Azərbaycan Dövlət Muzeyində elmi işçi kimi fəaliyyətə başlayıb.
1938–1940-cı illərdə Cəfərzadə Gəncədə aparılan arxeoloji qazıntılara rəhbərlik edib. Orta əsrlərə aid şəhər qalıqlarını araşdıran alim qazıntıların nəticələrini "Qədim Gəncənin tarixi-arxeoloji oçerki" adlı əsərində toplayıb. 1944-cü ildə həmin əsəri dissertasiya kimi müdafiə edib.
Cəfərzadənin araşdırdığı abidələr arasında Bakı buxtasındakı Səbail qalası da var. Xəzərin suyu çəkiləndə üzə çıxan bu orta əsr abidəsini alim 1938 və 1946-cı illərdə tədqiq edib.
Qayaüstü təsvirlər üzərində apardığı uzunillik araşdırmaların nəticələrini isə 1973-cü ildə nəşr olunan "Qobustan" kitabında toplayıb.