Gəncənin 5 nömrəli uşaq musiqi məktəbi Zərif Qayıbovun adını daşıyır.
Gencexeber.az məlumat verir ki, cəmi 23 il yaşayan bu gəncəli tarzən Moskvada mükafat qazanıb, ifaları radioda səslənib, doğma şəhərində isə orkestr yaradıb.
Tar çalmağı Gəncədə öyrənən Zərif Bakıda Əhməd Bakıxanovun tələbəsi olub. Müəllimi xatırlayırdı ki, Zərif muğamı öyrənəndən sonra ifaya öz gəzişmələrini əlavə edirdi. Bakıxanov tələbələri arasında ən çox onun "Şur" ifasından zövq aldığını deyirdi.
1939-cu ildə Zərif Moskvada keçirilən Ümumittifaq müsabiqəsində "Şur" muğamı və "Ləzginka" oyun havasını ifa edərək mükafat qazanıb. Filarmoniyada çıxış edib, Azərbaycan Opera və Balet Teatrında çalışıb. 1940-cı ildə Gəncəyə qayıdaraq şəhərin musiqiçilərini bir orkestrdə toplayıb.
Dostu Fikrət Əmirov onun tarın sarı simlərindəki çalğısını xüsusi xatırlayırdı: "Zərif "Şur" üçün yaranmışdı". 2025-ci ildə Gəncə Dövlət Filarmoniyasında tarzənin xatirəsinə həsr olunan konsertdə də "Şur" səslənib.
Zərif Qayıbovun kiçik qardaşı İsmət Qayıbov sonralar müstəqil Azərbaycanın ilk baş prokuroru olub. Zərif 1943-cü il dekabrın 14-də Gəncədə vəfat edəndə İsmət hələ körpə idi.