Gəncənin "İmamzadə ziyarətgah" kompleksinə gələn vətəndaşlar sanitar qovşağın vəziyyətindən şikayət edirlər.
Gencexeber.az-a müraciət edən ziyarətçilərin sözlərinə görə, kompleksin sanitar qovşağında yaranan üfunət səbəbindən içəridə dayanmaq belə mümkün deyil.
Şikayətçilər bildirirlər ki, Gəncəyə səfər edən turistlər də sanitar şəraitlə qarşılaşdıqda narazılıqlarını gizlətməyiblər.
"Dünən, noyabrın 21-də Dağıstandan gələn turistlər "İmamzadə"nin tualetinə daxil olub iyrəndilər və baş götürüb getdilər. Şəxsən mən bu vəziyyətə görə xeyli xəcalət çəkdim", – vətəndaş bildirib.
Sakinlər və ziyarətçilər aidiyyəti qurumlardan kompleksdə mütəmadi təmizlik işlərinin aparılmasını, sanitar qovşaqların vəziyyətinin yaxşılaşdırılmasını və sanitariya normalarına uyğun şərait yaradılmasını tələb edirlər.