Gəncənin Gülüstan qəsəbəsində yeni asfaltlanan yol qazılıb, daha sonra isə qazıntı aparılan hissə asfalt əvəzinə torpaqla doldurulub.
Gencexeber.az-a daxil olan məlumata görə, Tofiq Bağırov küçəsində, "3 Qardaş" marketin yaxınlığında Azərbaycan Dövlət Su Ehtiyatları Agentliyinin (ADSEA) əməkdaşları tərəfindən qazıntı işləri aparılıb.
Bildirilir ki, qazılan yolun həmin hissəsində asfalt örtüyünün bərpası əvəzinə torpaq tökülüb. Vətəndaşlar buna etiraz etdikdə isə qurumun əməkdaşları ərazidən sürətlə uzaqlaşıblar.
Sakin hesab edir ki, qazılan hissəyə ən azı çınqıl və ya digər bərkidici material tökülərək yolun səthi düzəldilməli, daha sonra asfalt örtüyü bərpa olunmalı idi.
Məsələ ilə bağlı redaksiyamız tərəfindən İri Şəhərlərin Birləşmiş Su Təchizatı Xidmətinə sorğu ünvanlanıb.