Bakı şəhərində keçirilən ağırlıqqaldırma üzrə Azərbaycan çempionatında Gəncə və Samux idmançıları uğurlu çıxışları ilə yadda qalıblar.
Gencexeber.az xəbər verir ki, Gəncə və Samuxun ağırlıqqaldırma bölməsinin yetirmələri yarışda bir qızıl, üç gümüş və üç bürünc medal qazanıblar.
Belə ki, Gəncə şəhər 2 nömrəli Uşaq-Gənclər İdman-Şahmat Məktəbinin yetirməsi Mirmövsüm Tagızadə 60 kiloqram çəki dərəcəsində bütün rəqiblərini qabaqlayaraq I yerə layiq görülüb.
Çempionatda II yerə layiq görülən idmançılar:
Ruslan Həsənov – 88 kq ("Gəncə Bəhrə");
Sənan Quliyev – 94 kq ("Samux Bəhrə");
Nəzrin Hüseynli – 53 kq ("Samux Bəhrə").
III yerlərin sahibləri:
Kərəm Əliyev – 71 kq (Gəncə şəhər 1 nömrəli Uşaq-Gənclər İdman-Şahmat Məktəbi);
Yaqub Həsənov – 94 kq ("Gəncə Bəhrə");
Sona Quliyeva – 53 kq ("Samux Bəhrə").
Qeyd edək ki, yarışda uğurlu nəticə göstərən Ruslan Həsənov 88 kiloqram çəki dərəcəsində çıxışı ilə idman ustası normasını da yerinə yetirib.
