Gəncə Avtomobil Zavodu İstehsalat Birliyində Azərbaycan tarixinə qızıl hərflərlə yazılan və ölkəmizin parlaq Qələbəsi ilə nəticələnən Vətən müharibəsinin 6-cı ildönümü ilə əlaqədar yığıncaq keçirilib.
Gencexeber.az məlumat verir ki, tədbirdə müəssisənin rəhbərliyi ilə yanaşı, bu Qələbədə birbaşa pay sahibi olan, həmin çətin anlarda vətəndaşlıq borclarını şərəflə yerinə yetirmək üçün ordu sıralarına yollanan əməkdaşlar, həmçinin Birinci Qarabağ müharibəsində döyüşmüş işçilər də iştirak ediblər.
Tədbir Vətənimizin azadlığı və müstəqilliyi uğrunda canlarından keçən şəhidlərin xatirəsinin bir dəqiqəlik sükutla yad edilməsi və Azərbaycanın Dövlət Himninin səsləndirilməsi ilə başlayıb.
Birliyin direktor müavini Bağban Nəbiyev çıxış edərək Müzəffər Ali Baş Komandan İlham Əliyevin rəhbərliyi ilə rəşadətli Ordumuzun sona qədər qəhrəmancasına mübarizə apararaq torpaqlarımızı erməni işğalından azad etməsini böyük tarixi hadisə adlandırıb.
Tədbirdə 44 günlük müharibənin xronikasına həsr olunan "Zəfərə aparan yol" adlı sənədli film nümayiş etdirilib.
Sonra çıxış edən Birliyin mətbuat katibi Məqsəd Rəhimov 44 günlük Vətən müharibəsinin hər bir azərbaycanlı üçün qürur nümunəsi olduğunu bildirib.
Zəfər Günü münasibətilə müəssisənin bütün qaziləri, veteranları və müharibə iştirakçıları mükafatlandırılıblar.
Sonda veteranlarla və qazilərlə xatirə şəkli çəkdirilib.
