Tovuz rayonunda 40 yaşlı kişi qadının evinə qanunsuz daxil olmaqda ittiham edilib.
İstintaq sənədlərinə görə, gecə saat 1 radələrində 1986-cı il təvəllüdlü Ayaz sevgi münasibətində olduğu Ləmanın Tovuz şəhərindəki evində sərxoş vəziyyətdə yatıb.
Ayaz yuxudan oyandıqdan sonra Ləmanın mənzildə olmadığını görüb və onun tanışı Xalidənin (adlar şərtidir – red.) evinə getdiyini düşünüb.
Buna görə də Xalidənin icazəsi olmadan mənzilə daxil olub və Ləmanın orada olub-olmadığını soruşub. Xalidə onun mənzilə icazəsiz daxil olmasına etiraz edib və Ləmanın evdə olmadığını bildirib. Xalidə Ayazdan çöldə gözləməsini, Ləmanı telefonla çağıracağını deyərək mənzildən çıxarıb. Daha sonra Ayaz Xalidənin Ləmanın olduğu yer barədə ona yalan danışdığını düşünüb.
Bundan sonra üzərindəki bıçaqla mənzilin bağlı vəziyyətdə olan giriş qapısını zədələyib, təpiklə qapını sındırıb və mənzilə daxil olub.
Ayaza Cinayət Məcəlləsinin 157.2-ci (mənzil toxunulmazlığını pozma – eyni əməllər zor tətbiq etməklə və ya zor tətbiq etmə hədəsi ilə törədildikdə) maddəsi ilə ittiham elan edilib.
İş üzrə izahat verən Ayaz ona elan olunmuş ittiham üzrə özünü təqsirli bilib. Təqsirləndirilən şəxs qeyd edib ki, hadisədən bir gün əvvəl, saat 19 radələrində Xalidə onların evinə gəlib və birlikdə araq içiblər.
Tovuz Rayon Məhkəməsinin hökmü ilə Ayaz 6 ay müddətinə azadlıqdan məhrum edilib.
Mənbə: demokrat.аz
