Rusiyanın Əməkdar artisti, müğənni və bəstəkar Boris Şvartsmanın ilk sevgisi də, yaradıcılığa ilk addımları da Gəncə ilə bağlıdır. İllər sonra şəhərə qayıdanda isə bu xatirələr ayrıca bir mahnıya çevrilib.
Gencexeber.az məlumat verir ki, yəhudi əsilli sənətçi 22 aprel 1961-ci ildə Gəncədə anadan olub. Musiqi təhsilini burada alıb, təxminən 12 yaşından şeir yazmağa başlayıb. İlk gitara akkordlarını, ansamblını və teatr dərnəyini xatırlayarkən də Gəncədən danışır.
Atası Natan şəhərdəki Alüminium zavodunda baş energetikin müavini işləyib, anası Anna üç övladını böyüdüb. Onu gitara ilə tanış edən və səhnəyə həvəsləndirən isə böyük qardaşı Yakov olub.
Şvartsmanın uşaqlıq xatirələri arasında dostları ilə futbol və buz olmadığı üçün asfalt üzərində oynadıqları xokkey də var.
Uzun ayrılıqdan sonra dostlarının dəvəti ilə Gəncəyə gələn Şvartsman gördüklərindən və yaşadığı duyğulardan təsirlənərək "Город мой Гянджа" ("Mənim şəhərim Gəncə") mahnısını yazıb.
