37 yaşlı kişi onunla birlikdə gecələmək istəməyən qadına xəsarət yetirib.
1989-cu il təvəllüdlü Ceyhun yanına qonaq gəlmiş, lakin onunla birlikdə qalaraq gecələmək təklifini rədd etmiş Elmira (adlar şərtidir - red.) ilə mübahisə edib.
Aralarında şəxsi münasibətlər zəminində yaranmış mübahisə zamanı o, qadının üzünə xəsarətlər yetirib.
Ceyhuna Cinayət Məcəlləsinin 128-ci maddəsi ilə ittiham elan edilib.
O, ifadəsində bildirib ki, Elmira ilə 2025-ci ildə "TikTok" sosial platformasında tanış olub və həmin vaxtdan münasibətləri yaranıb:
"Bir neçə gün danışıb mesajlaşdıqdan sonra ona zəng vurdum və Yeni il bayramını birlikdə keçirmək üçün Mingəçevirdən Ucara gətirdim. Birlikdə Ucar şəhərində vaxt keçirdik. Gün sonu tam sərxoş olduq. Taksidə Elmiraya birlikdə qalmağı təklif edərək səhər onu yola salacağımı bildirdim. Lakin o, artıq gec olduğunu, evə getmək istədiyini və bu dəfə mənimlə qalıb gecələyə bilməyəcəyini bildirdi. Elmiranın hərəkəti mənə pis təsir etdiyindən və əsəbiləşdiyimdən avtomobildən düşdüm və yumruqla Elmiranın burnuna, ardınca isə üzünə şillə vurdum".
Ucar Rayon Məhkəməsinin hökmü ilə Ceyhun 10 ay müddətinə azadlığın məhdudlaşdırılması cəzasına məhkum edilib.
Mənbə: demokrat.аz
