Gəncə şəhəri ilə bitişik Göygöl rayonunun Quşqara kənd sakinləri ictimai nəqliyyatla bağlı ciddi problemlərlə üzləşiblər.
Gencexeber.az-a müraciət edən vətəndaşlar bildiriblər ki, kənd əhalisinə xidmət göstərən aztutumlu, təxminən 20 nəfərlik avtobuslar sərnişin tələbatını ödəmir. Bazar günləri isə bu nəqliyyat vasitələri ümumiyyətlə hərəkət etmir.
Şikayətçilərin sözlərinə görə, xüsusilə səhər saatlarında işə və şəhərə getmək istəyən vətəndaşlar uzun müddət dayanacaqda avtobus gözləməli olurlar. Nəticədə taksi xidmətindən istifadə edərək gündəlik 4-5 manat əlavə xərc çəkməli olurlar.
Sakinlər qeyd edirlər ki, kəndin hava limanı istiqamətində yerləşməsi və ərazidə SOCAR-ın yanacaqdoldurma məntəqəsinin olması nəzərə alınaraq, "BakuBus" avtobuslarının marşrutunun hava limanı yolundan keçməklə Quşqara kəndinə qədər uzadılması məqsədəuyğun olardı.
Quşqara sakinləri aidiyyəti qurumlardan yaranmış problemin həllinə kömək göstərilməsini xahiş edirlər.
Məsələ ilə bağlı redaksiyamız tərəfindən Azərbaycan Yerüstü Nəqliyyat Agentliyinə (AYNA) sorğu ünvanlanıb. .
