Xəbər verdiyimiz kimi, ölkə başçısı İlham Əliyev 2026-cı il Gənclər üçün Prezident mükafatının verilməsi haqqında Sərəncam imzalayıb.
Gencexeber.az məlumat verir ki, yüksək dövlət mükafatına layiq görülən gənclərdən biri də Lamiyə Famil qızı Məmmədovadır. O, hazırda "Böyük Qayıdış" Gənclər Təşkilatının İdarə Heyətinin üzvü, "DAVAM" Gənclər Hərəkatının sədr müavini, Qarabağ Universitetində sosiologiya üzrə müəllim və tələbələrlə iş üzrə böyük mütəxəssis kimi fəaliyyət göstərir.
Qeyd edək ki, Lamiyə Famil qızı Məmmədova 1999-cu ildə Gəncə şəhərində anadan olub. 31 nömrəli tam orta məktəbi bitirdikdən sonra 2016-cı ildə yüksək balla Bakı Dövlət Universitetinin Filologiya fakültəsinin "Azərbaycan dili və ədəbiyyat müəllimliyi" ixtisasına daxil olub. 2017-ci ildən SABAH qruplarında təhsilini davam etdirib və 2020-ci ildə universiteti fərqlənmə diplomu ilə bitirib.
Həmin ildə Azərbaycan Dövlət Mədəniyyət və İncəsənət Universitetinin "Gənclərlə iş" ixtisası üzrə magistratura pilləsinə qəbul olunub və 2022-ci ildə magistr təhsilini fərqlənmə diplomu ilə başa vurub. Tələbəlik illərindən etibarən ictimai və sosial fəaliyyətlə fəal məşğul olub, SABAH Könüllüləri hərəkatında iştirak edib. Sosial iş sahəsi üzrə 2 məqalə və 1 tezisin müəllifidir. "Coursera" platforması vasitəsilə gənclərlə iş, idarəetmə və yumşaq bacarıqlar üzrə beynəlxalq sertifikatlar əldə edib.
Lamiyə Məmmədova müxtəlif illərdə Gənclərin İnkişaf və Karyera Mərkəzi Gəncə nümayəndəliyi, Azərbaycan Respublikasının Gənclər Fondu, "SOS" Uşaq Kəndləri Azərbaycan və "Böyük Qayıdış" Gənclər Təşkilatında müxtəlif vəzifələrdə çalışıb. Onun fəaliyyəti dövründə 40-dan çox irimiqyaslı proqram və layihə, 400-dən artıq təlim və seminar icra olunub.
2022–2024-cü illərdə "Qayıdış Könüllüləri" Proqramının rəhbəri olub, işğaldan azad edilmiş ərazilərlə bağlı dövlət proqramları çərçivəsində layihələrə rəhbərlik edib. Beynəlxalq layihələrdə Azərbaycanı uğurla təmsil edib.
2023-cü ildə "İlin gənci" nominasiyası ilə təltif olunub.
