Keçmiş Şəmkir şəhər stadionunun yerləşdiyi ərazi hazırda baxımsızlıq və dağıntılarla diqqət çəkir.
Gencexeber.az-ın məlumatına görə, bir vaxtlar minlərlə azarkeşin toplaşdığı tribunanın dağılmış hissəsi, tikinti zibilləri, alaq otları və sıradan çıxmış yollar ərazinin ümumi mənzərəsini daha da acınacaqlı hala salır.
Məlumata görə, Şəmkir şəhər stadionu müxtəlif illərdə bölgə futbolunun əsas mərkəzlərindən biri olub. Tutumu 11 min 500 nəfər olan arena uzun müddət "Şəmkir" Futbol Klubunun ev oyunlarına ev sahibliyi edib. Stadion həmçinin 2004-cü ildə UEFA Kubokunun oyunlarından birinin keçirildiyi idman obyektləri sırasında yer alıb.
Lakin maliyyə problemləri səbəbindən ikiqat Azərbaycan çempionu olan "Şəmkir" FK fəaliyyətini dayandırıb. Bunun ardınca klubun ev arenası kimi istifadə olunan stadion da istifadəsiz qalıb. Baxımsızlıq nəticəsində ot örtüyü yararsız vəziyyətə düşüb, tribunaların tavanı isə çöküb.
Qeyd edək ki, stadion 2020-ci ildə satışa çıxarılıb. Dörd hektar ərazini əhatə edən arenaya 4 milyon manat qiymət qoyulub. Növbəti il – 2021-ci ildə isə stadion tamamilə sökülüb.
Yerli sakinlər və idman ictimaiyyəti vaxtilə Şəmkir futbolunun simvolu olan bu ərazinin taleyi ilə bağlı narahatlıqlarını ifadə edir, gələcəkdə ərazinin yenidən idman və ya ictimai məqsədlər üçün istifadə olunacağına ümid etdiklərini bildirirlər.
