Gəncəli idmançılar yurda qələbə ilə dönüblər. Bu haqda 6 fevral tarixində Şahmat Federasiyasına istinadən məlumat veririk.
Şirvanda şahmat üzrə Azərbaycan çempionatının seçmə yarışları keçirilib. Turnir Gənclər və İdman Nazirliyi və Azərbaycan Şahmat Federasiyasının birgə təşkilatçılığı ilə Şirvan Olimpiya İdman Kompleksində baş tutub. Burada idmançılar 8, 10, 12, 14 və 16 yaş qrupu üzrə mübarizə aparıblar. Ümumilikdə yarışa Bakı şəhəri istisna olmaqla ölkənin 36 şəhər və rayonundan 284 yeniyetmə şahmatçı iştirak edib.
Sonda qaliblərin adları açıqlanıb. Nizami yurdundan üç nəfər: Vahid Bəşirli, Hüseyn Qurbanov və Zarina Mustafayeva birinci yerə layiq görülüblər. Sonda yarışda fəal iştirak edən və ayrı-ayrı yaş qrupları üzrə şəxsi birincilikdə qalib gələn şahmatçılara təşkilatçılar tərəfindən diplom təqdim olunub.
Bildirilir ki, ümumilikdə 46 şahmatçı iyun ayında keçiriləcək Azərbaycan çempionatına vəsiqə qazanıb.
