Gəncədə "BakuBus" MMC-nin fəaliyyətindən narazılıqlar artmaqda davam edir.
Gencexeber.az-a son günlər daxil olan onlarla şikayətə görə, şəhərin müxtəlif ərazilərində avtobuslar arasında interval 40 dəqiqəyədək uzanır.
Məlum olduğu kimi, ötən ilin sentyabr ayından etibarən Gəncədə fəaliyyətə başlayan "BakuBus" MMC-yə 18 şəhərdaxili marşrutla yanaşı, Gəncə ilə Göygöl arasında sərnişindaşımanı həyata keçirən iki marşrut da həvalə edilib.
Sərnişinlərin iddiasına görə, Gəncə avtoparkına 250-dən çox nəqliyyat vasitəsinin cəlb edilməsinə baxmayaraq, əksər marşrutlarda avtobuslar faktiki olaraq 30-35 dəqiqəlik intervalla hərəkət edir. Yollarda sıxlıq yarandıqda isə avtobusların dayanacaqlara çatma müddətinin 40 dəqiqəni keçdiyi bildirilir.
3 nömrəli marşrut xəttində isə iri tutumlu avtobuslar daha kiçik olan ikiqapılı nəqliyyat vasitələri ilə əvəz edilib. Vətəndaşların sözlərinə görə, bu hal xüsusilə günün pik saatlarında sıxlığın artmasına səbəb olur.
Məsələ ilə bağlı bir neçə sürücüdən daxil olan şikayətə görə, narazılıq yalnız sərnişinlərlə məhdudlaşmır. Bir çox sürücülər avtobusların hərəkət qrafiki və iş rejimindən şikayət edirlər.
Onların sözlərinə görə, bəzi marşrutlarda avtobuslar arasında intervalın uzun olması onların iş yükünü artırır. Onlar əmək müqaviləsinə əsasən həftəlik 40 saat işləməli olduqları halda, hazırda gündəlik 10-12 saat işləməyə məcbur edildiklərini və bunun müqabilində ödəniş edilmədiyini bildirirlər.
Şirkətin əməkdaşları son dövrlərdə yorğunluq səbəbindən qəzaların artığını, eləcə də sürücülərin səhhətinin pisləşməsi hallarını artdığını deyirlər.
İddialara görə, uzun müddət bu rejimdə çalışan 10-a yaxın sürücü işdən ayrılmaq məcburiyyətində qalıb.
Məsələ ilə bağlı redaksiyamız tərəfindən "BakuBus" MMC-yə sorğu ünvanlanıb.
