Gəncə Beynəlxalq Avtovağzal Kompleksinin ərazisində asfalt örtüyü yararsız vəziyyətdədir.
Gencexeber.az məlumat verir ki, avtovağzalın girişindən avtobusların dayanma nöqtəsinədək yol örtüyü tamamilə sıradan çıxıb.
9, 11, 13, 15 və 16 nömrəli şəhərdaxili avtobuslar, eləcə də digər şəhər və rayonlara sərnişindaşıma həyata keçirən avtobuslar hər gün bu ərazidən istifadə edir. Yolun nahamar vəziyyətdə olması nəqliyyat vasitələrinin texniki cəhətdən daha tez sıradan çıxmasına, eləcə də vətəndaşların komfortunun əhəmiyyətli dərəcədə pozulmasına səbəb olur.
Bundan əlavə, yağışlı havalarda ərazidə gölməçələr yaranır ki, bu da sərnişinlərin hərəkətini çətinləşdirir və əlavə narahatlıq yaradır.
Vətəndaşlar aidiyyəti qurumlardan problemin aradan qaldırılmasını və avtovağzalın ərazisində asfalt örtüyünün yenilənməsini xahiş edir.
