11 oktyabr 2020-ci ildə Ermənistan silahlı qüvvələri Azərbaycanın ikinci böyük şəhəri olan Gəncəni dördüncü dəfə raket atəşinə tutub.
Gencexeber.az məlumat verir ki, gecə saat 02:00-da atılan raket "Qələbə parkı"nın ətrafında yerləşən yaşayış ərazisinə düşərək binaları dağıdıb. Nəticədə dinc sakinlərdən 10 nəfər həlak olub, 34 nəfər yaralanıb.
Bu raket hücumları nəticəsində 31 mənzil tamamilə uçub, hadisə yerindəki və onun yaxınlığındakı obyektlərə ciddi ziyan dəyib. Hücumdan ümumilikdə 205 nəfərin yaşadığı 95 mənzil qəzalı vəziyyətə düşüb.
Azərbaycan Müdafiə Nazirliyinin məlumatına görə, şəhər Ermənistanın Berd rayonunda yerləşən erməni silahlı qüvvələri tərəfindən "Skad" tipli ballistik raketlərlə atəşə tutulub.
Ümumilikdə (4, 5, 8, 11 və 17 oktyabr tarixlərində) Gəncə şəhərinə endirilən raket zərbələri nəticəsində 6-sı uşaq və yeniyetmə olmaqla 26 nəfər həlak olub, 29-u uşaq olmaqla 130-a yaxın insan müxtəlif dərəcəli bədən xəsarətləri alıb. Bu hadisələr zamanı 3 ailənin üzvü olan 4 uşaq hər iki valideynini itirib.
