Elm və Təhsil Nazirliyinin sifarişi ilə Göygöl rayonunun dağətəyi kəndlərindən olan Topalhəsənli kəndində yeni məktəb inşa edilir.
Gencexeber.az-ın məlumatına əsasən, kənddə sovet dönəmindən günümüzədək qalan köhnə məktəb artıq sökülüb, yerində müasir tədris müəssisəsinin tikintisi gedir.
“Rövşən Oğuz” şirkəti tərəfindən həyata keçirilən tikinti prosesi davam edir, məktəb binasının bünövrə işləri bitib, hörgü işlərinə başlanılıb. Tədris ocağı iki korpusdan ibarət olacaq. Birinci korpus iki, digər korpus isə bir mərtəbəli olacaq.
Qeyd olunur ki, yeni məktəb binası bütün müasir tələblərə cavab verəcək. Məktəbdə 200-dən artıq şagird təhsil alacaq.
Məktəb binasının yeni tədris ilində istifadəyə verilməsi nəzərdə tutulur.
