Gəncənin bir sıra küçələrində səhər saatlarından elektrik enerjisi yoxdur.
Gencexeber.az məlumat verir ki, Gəncə şəhərinin Cavad xan, Mikayıl Müşfiq, Şota Rustaveli, Dədə Yadigar və bir sıra digər küçələrində saat 05:00 radələrindən etibarən elektrik enerjisinin verilişi dayandırılıb.
Sakinlərin sözlərinə görə, onlar problemin səbəbini öyrənmək üçün "199" Çağrı Mərkəzi ilə əlaqə saxlamağa çalışsalar da, cəhdləri nəticəsiz qalıb.
Redaksiyamız tərəfindən məsələ ilə bağlı "Azərişıq" ASC-yə sorğu ünvanlanıb. Qurumdan verilən məlumata görə, sentyabrın 30-u səhər saatlarında quruma məxsus yeraltı elektrik xəttində qəza baş verib. Hazırda qurumun əməkdaşları qəzanın aradan qaldırılması istiqamətində təmir işlərini davam etdirirlər. Bildirilib ki, yaxın bir saat ərzində elektrik enerjisinin verilişi tam bərpa olunacaq və sakinlərin fasiləsiz elektrik enerjisi ilə təchizatı təmin ediləcək.
