Gəncədə Poçt qəsəbəsində, "Tural" şadlıq sarayının qarşısında yerləşən avtobus dayanacağının yaxınlığında piyada keçidini bildirən xətlənmə işləri aparılmayıb.
Gencexeber.az-a daxil olan şikayətə görə, yolda nəqliyyat vasitələrinin bəziləri yüksək sürətlə hərəkət edir. Bu isə dayanacaqdan istifadə edən insanların yolu təhlükəsiz şəkildə keçməsini çətinləşdirir.
Ərazidə orta məktəbin də yerləşməsi vəziyyəti daha da narahatedici edir. Vətəndaşlar xüsusilə məktəbə gedib-gələn şagirdlərin yolu keçərkən təhlükə ilə üzləşdiyini bildirirlər.
Sakinlər aidiyyəti qurumlardan əraziyə baxış keçirilməsini, yol hərəkəti şəraitinin qiymətləndirilməsini və insanların, xüsusilə məktəblilərin təhlükəsizliyinin təmin olunması üçün müvafiq tədbirlər görülməsini xahiş edirlər.
