Gəncədə istifadəyə verilən yaşayış evlərinin sahəsi 2025-ci ildə kəskin artıb.
Gencexeber.az-ın Dövlət Statistika Komitəsindən əldə etdiyi məlumata görə, 2025-ci ildə Gəncə şəhərində istifadəyə verilən yaşayış evlərinin ümumi sahəsi 106 min 376,7 kvadrat metr təşkil edib.
2024-cü ildə bu göstərici Gəncədə cəmi 2 min 396,5 kvadrat metr olub. Bu isə 2025-ci ildə istifadəyə verilən yaşayış evlərinin ümumi sahəsində əvvəlki illə müqayisədə təxminən 44 dəfə artım deməkdir.
Məlumata görə, Gəncə-Daşkəsən iqtisadi rayonunda 2025-ci ildə istifadəyə verilən yaşayış evlərinin ümumi sahəsi 218 min 972,2 kvadrat metr olub. Bunun 106 min 376,7 kvadrat metri Gəncə şəhərinin, 4 min 072,9 kvadrat metri Naftalan şəhərinin, 5 min 906,7 kvadrat metri Daşkəsən rayonunun, 27 min 713,5 kvadrat metri Goranboy rayonunun, 54 min 028,8 kvadrat metri Göygöl rayonunun, 20 min 873,3 kvadrat metri isə Samux rayonunun payına düşüb.
Qeyd edək ki, 2023-cü ildə Gəncədə istifadəyə verilən yaşayış evlərinin ümumi sahəsi 32 min 133,6 kvadrat metr təşkil edib.
