Goranboyda həyat yoldaşını taxta parçası ilə döyən kişi məhkum edilib.
Gencexeber.az-ın məlumatına görə, hadisə rayonun Qızılhacılı qəsəbəsində baş verib.
Məhkəmə materiallarına əsasən, hadisə günü 1982-ci il təvəllüdlü təqsirləndirilən Nahid sərxoş vəziyyətdə yaşadıqları evə gəlib. O, evə daxil olduqdan sonra arvadından Rusiyada işlədiyi zaman özü ilə gətirdiyi ayaqqabını verməsini istəyib. Qadın isə ayaqqabının ona nə üçün lazım olduğunu soruşub.
Bundan sonra Nahid həmin ayaqqabını "alkaş yoldaşına verəcəyini" deyib. Zərərçəkmiş şəxs isə ayaqqabını ona verməyəcəyini bildirib. Bu səbəbdən tərəflər arasında mübahisə yaranıb. Mübahisə zamanı kişi həyətdə olan taxta parçasını götürərək qadının kürək və arxa nahiyəsinə bir neçə dəfə zərbə endirib.
Təqsirləndirilən şəxs məhkəmədə ittiham üzrə özünü təqsirli bilib. Məhkəmədə zərərçəkmiş qadın həyat yoldaşı ilə barışdığını deyib.
Goranboy Rayon Məhkəməsinin hökmü ilə Nahidə 1 il müddətinə azadlığın məhdudlaşdırılması cəzası təyin edib.
Əsmər Sənani
