Gəncədə müxtəlif şəxsləri işə düzəltmək vədi ilə aldadaraq pul alan şəxsin cinayət işi üzrə məhkəmə istintaqı başa çatıb.
Məhkəmə materiallarına görə, təqsirləndirilən şəxs tanışları ilə aralarında yaranmış etibarlı münasibətlərdən istifadə edərək Gəncə-Daşkəsən Regional Təhsil İdarəsində və digər qurumlarda əlaqələrinin olduğunu bildirib. O, müxtəlif şəxslərin özlərini və ya yaxınlarını işə düzəldəcəyini, başqa bir halda isə təqaüdü bərpa etdirəcəyini vəd edib. Cinayət işi üzrə ayrı-ayrı epizodlarda zərərçəkmişlərdən alındığı göstərilən pulların ümumi məbləği 33 190,20 manat təşkil edib.
Məhkəmə istintaqı zamanı təqsirləndirilən şəxs elan olunmuş ittihamları qəbul edib. O, əməlləri maddi ehtiyac səbəbindən törətdiyini bildirib.
Məhkəmə təqsirləndirilən şəxsə Cinayət Məcəlləsinin müxtəlif maddələri ilə 3 il 6 ay müddətinə azadlıqdan məhrumetmə cəzası təyin edib.
Mənbə: qaynarinfo.аz
