Gəncəçay yenidən çirklənmə problemi ilə gündəmə gəlib.
Gencexeber.az-a daxil olan çoxsaylı şikayətlərə görə, çayın vəziyyəti ürəkaçan deyil. Sakin tərəfindən redaksiyamıza göndərilən videogörüntülərdə çayın məcrasında toplanan məişət və müxtəlif mənşəli tullantılarla çirkləndiyi açıq şəkildə görünür.
Plastik qablar, torbalar və digər zibillərlə dolu Gəncəçay çirkab anbarını xatırladır. Mütəmadi xəbərdarlıqlara, Gəncə şəhər Mənzil Kommunal Təsərrüfatı İstehsalat Birliyi (MKTİB) tərəfindən keçirilən təmizlik aksiyalarına və tətbiq olunan cərimələrə baxmayaraq, problem hələ də öz həllini tapmayıb.
Ekoloji vəziyyətdən narahat olan sakinlər aidiyyəti qurumlardan təcili tədbirlər görülməsini tələb edirlər. Onların sözlərinə görə, bu mənzərə Gəncənin adına yaraşmır və çayın "boğulması" gələcək fəsadlara yol aça bilər.
