Xəbər veridiyimiz kimi, İran Ali Məhkəməsi Azərbaycanın Tehrandakı səfirliyinə iki il öncə terror hücumu həyata keçirən Yasin Hüseynzadə barəsində çıxarılan edam hökmünü təsdiqləyib.
Gencexeber.az-a xain hücum zamanı həyatını itirən Orxan Əsgərovun atası Rizvan Əsgərov verilən qərara münasibət bildirib. O, açıqlamasında deyib ki, hadisədən iki il keçməsinə baxmayaraq İranda çıxarılan ölüm hökmü hələ də icra olunmur.
“Terror hadisəsindən iki il keçməsinə baxmayaraq İran İslam Respublikasında terrorçunun layiqli cəza almasına əngəllər törədilir. Bununla əlaqədar Bakıda dəfələrlə İranın müvafiq hüquq-mühafizə orqanlarının rəhbəri ilə görüşüm olub. Həmin görüşlərdə bildirildi ki, islam dininin qanunlarına uyğun həmin şəxsi kompensasiya qarşılığında bağışlaya da bilərik, edam da edə bilərik. Mənim qərarım isə həmin şəxsin edam olunması oldu, bununla bağlı müxtəlif sənədlər hazırladıb, İrana yollamışıq. Ancaq iki il keçməsinə baxmayaraq qərar icra olunmadı. Dövlət rəhbərinin və digər müvafiq qurumların bu məsələyə ciddi yanaşması nəticəsində axır ki, İranın Ali Məhkəməsi bu qərarı təsdiq etdi. Bununla bağlı yenidən İrana müəyyən sənədlər yolluyacağıq, yəqin ki, yaxın vaxtda edam hökmü icra olunacaq”, – Rizvan Əsgərov bildirib.
Xatırladaq ki, 2023-cü il yanvarın 27-də Bakı vaxtı ilə səhər saat 08:30 radələrində Azərbaycanın İrandakı səfirliyinə silahlı hücum olub. Hücum edən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı - Vasif Tağıyev və Mahir İmanov isə hücumun qarşısını alarkən yaralanıblar.
Qeyd edək ki, Orxan Rizvan oğlu Əsgərov 1982-ci ilin 5 noyabr tarixində Gəncədə dünyaya gəlib. Baş leytenant O.Əsgərov Azərbaycan Respublikasının İran İslam Respublikasındakı Səfirliyinin Mühafizə Xidmətinin rəisi vəzifəsində çalışıb.
Hadisənin baş verdiyi gün şəhid elan edilən Orxan Əsgərov 3 fevral 2023-cü ildə Azərbaycan Respublikası Prezidentinin sərəncamı ilə ölümündən sonra "Vətən uğrunda" medalı ilə təltif edilib.
