Gəncəli tələbə Qazaxıstanda keçirilən beynəlxalq konfransda II yerə layiq görülüb.
Gencexeber.az məlumat verir ki, Gəncə şəhərindən olan Azərbaycan Dövlət Neft və Sənaye Universitetinin kimya mühəndisliyi (ingilis bölməsi) ixtisası üzrə III kurs tələbəsi və hazırda mübadilə proqramı çərçivəsində Qazaxıstanın Satbayev Universitetində təhsil alan 2005-ci il təvəllüdlü gənc tədqiqatçı Vüsal Babarabov Almatı şəhərində təşkil olunan "Neft, Qaz və Enerjinin Gələcəyi: Texnoloji İnnovasiya, Rəqəmsal Həllər və Dekarbonizasiya Dövründə Dayanıqlı İnkişaf üzrə Beynəlxalq Gənclər Elmi-Praktik Konfransı"nda iştirak edib.
O, Qazax-Britaniya Texniki Universitetində keçirilən konfransın "Dayanıqlı İnkişaf üçün Funksional Materiallar" bölməsində təqdim etdiyi tədqiqat işi II yerə layiq görülüb. Onun araşdırması biodeqradasiya olunan polimerlərin, xüsusilə polilaktik turşunun modifikasiyası və ekoloji təmiz kompozit materialların alınması metodlarına həsr olunub.
Bundan əlavə, Vüsal Babarabov təşkil olunan intellektual yarışda III yer qazanıb.
Qeyd edək ki, Vüsal Babarabov Gəncə şəhər Fizika, riyaziyyat və informatika təmayüllü liseyin məzunudur.
