Gəncəli tələbə Bakı Mühəndislik Universiteti (BMU) ilə INHA Universitetinin ikili diplom proqramı çərçivəsində təhsilini davam etdirmək üçün Koreya Respublikasına yollanıb.
Gencexeber.az məlumat verir ki, Gəncə şəhəri 40 nömrəli tam orta məktəbin məzunu olan Emiliya Xəlilova yüksək nəticələr göstərərək və əlavə imtahan verərək BMU–INHA ikili diplom proqramının İnşaat mühəndisliyi ixtisasına qəbul olunub.
O, təhsilinin ilk üç ilini Azərbaycanda, BMU-da başa vurub və dördüncü kursda təhsilini Koreyanın İnçon şəhərində yerləşən INHA Universitetində davam etdirəcək.
Məlumata görə, Emiliya Xəlilova həm məzun olduğu məktəbdən, həm də Gəncə şəhərindən İnşaat mühəndisliyi ixtisası üzrə BMU–INHA ikili diplom proqramı çərçivəsində Koreyada təhsilini davam etdirən ilk tələbədir.
Qeyd edək ki, Emiliya Xəlilova taekvondo üzrə Respublika birincisi, Belçikada keçirilən "Open" turnirində üçüncü yerə layiq görülən və müxtəlif beynəlxalq yarışlarda nəticələr əldə etmiş Rasim Xəlilovun bacısıdır. Gənc hazırda Azərbaycan Taekvondo Milli Komandasının üzvüdür.
