Gəncə Olimpiya İdman Kompleksində kikboksinq üzrə 30-cu Azərbaycan Birinciliyi keçirilib.
Gencexeber.az məlumat verir ki, "Kikboksinq narkomaniya və uşaq cinayətkarlığına qarşı" devizi altında təşkil olunan yarışda ölkənin müxtəlif bölgələrindən 1000-ə yaxın idmançı mübarizə aparıb.
Birincilikdə 2009–2010-cu il təvəllüdlü gənclər, 2011–2012-ci il təvəllüdlü yeniyetmələr və 2013–2014-cü il təvəllüdlü yeniyetmə kadetlər qüvvələrini sınayıblar.
Yarışda ev sahibi Gəncə komandasının üzvləri uğurlu çıxış edərək ümumilikdə 30 medal qazanıblar. İdmançılar 3 qızıl, 12 gümüş və 15 bürünc medala sahib olublar.
Gəncə komandasına qızıl medalları Həqiqət Məmmədova (42 kq), Əli Məmmədzadə (47 kq) və Həsən Allahyarov (71 kq) qazandırıblar.
Qeyd edək ki, Azərbaycan Birinciliyi ölkənin müxtəlif bölgələrindən olan gənc kikboksçuların iştirak etdiyi ən nüfuzlu yarışlardan biri hesab olunur.
