Gəncəli tələbə Afrikada qida çatışmazlığı yaşayan uşaqlara humanitar yardım edib.
Gencexeber.az-ın məlumatına görə, hazırda Türkiyənin İstanbul şəhərində təhsil alan 2007-ci il təvəllüdlü Kəmaləddin İftixari Afrika qitəsinin şərqində yerləşən Somali Federativ Respublikasının bölgələrinin birində aclıqdan əziyyət çəkən müsəlman uşaqlar üçün yardım aksiyası həyata keçirib.
Gənc redaksiyamıza bildirib ki, İstanbulun müxtəlif yerlərində Afrikadakı uşaqlara yardım çağırışlarının əks olunduğu posterlər tez-tez diqqətini çəkib: "Hər dəfə onların yanından keçəndə düşünürdüm ki, mən də kömək edə bilərəm".
Məsələni araşdırdıqdan sonra Kəmaləddin arzusunu reallaşdıra biləcək humanitar təşkilatla əlaqə saxlayıb və öz vəsaiti hesabına uşaqlar üçün yardım göndərilməsini təşkil edib. Ehtiyac sahibi uşaqlara 100 ədəd çörək və 100 ədəd meyvə şirəsi paylanılıb.
Kəmaləddin İftixari qeyd edib ki, bu onun ilk xeyriyyə addımı deyil. O, imkan daxilində tez-tez belə yardımlar etdiyini və gələcəkdə də davam etdirməyi planlaşdırdığını vurğulayıb.
Qeyd edək ki, gənc xeyriyyəçi Gəncə şəhər 13 nömrəli tam orta məktəbin məzunudur.
