Tural Teyyub oğlu Mirzəliyev muskulla qaldırma ("strict curl") üzrə növbəti böyük uğura imza atıb.
Gencexeber.az xəbər verir ki, Gəncə şəhər Fizika, riyaziyyat və informatika təmayüllü liseyin məzunu Polşada keçirilən muskulla qaldırma ("strict curl") üzrə Dünya Çempionatında bir gün ərzində idman hərəkətlərinin uğurla həyata keçirilməsinə görə 3 gümüş medal qazanıb. Habelə cəmi 18 yaşında "Beynəlxalq idman ustası" adına layiq görülüb və beynəlxalq "Pro Kart"a layiq görülüb.
Gəncəli strongmen redaksiyamıza bildirib ki, bir gün ərzində 4 dəfə Azərbaycan bayrağını qaldırmaq onun üçün böyük qürur hissidir.
Qeyd edək ki, bundan əvvəl Tural Mirzəliyev Macarıstanın Lakitelek şəhərində keçirilən "World Powerlifting Alliance" (WPA) yarışında dünya çempionu olub. O, 65 kiloqram çəki dərəcəsində çıxış edərək bütün rəqiblərini geridə qoyub və qızıl medal qazanıb.
Hazırda gənc idmançı Çexiyanın paytaxtı Praqa şəhərində yerləşən, Avropanın ən qədim və nüfuzlu ali təhsil müəssisələrindən biri olan Çarles Universitetində təhsil alır.
