Azərbaycanda sovet hakimiyyəti üçün ən təhlükəli adam adlandırılan gəncəli İsmayıl xan Ziyadxanov 159 il əvvəl, 15 avqust 1867-ci ildə Gəncə şəhərində anadan olub.
Gencexeber.az məlumat verir ki, İsmayıl xan sonuncu Gəncə xanı Cavad xan Ziyadoğlunun nəticəsidir. O, ilk təhsilini Gəncə gimnaziyasında alıb, sonra isə Moskva İmperator Universitetinin (indiki MDU) hüquq fakültəsini bitirib. Universiteti bitirdikdən sonra Tiflis Dairə Məhkəməsində prokuror müavini vəzifəsində işləyib.
İsmayıl xanın siyasi fəaliyyəti 1905-ci ildə Azərbaycanda erməni daşnaklarının törətdiyi qətliamlardan sonra başlayıb. 1906-cı ildə Ziyadxanov Yelizavetpol quberniyasının birinci Dövlət Dumasının deputatı seçilib. Dumanın müsəlman fraksiyasının büro və "Xalq Azadlığı" partiyasının üzvü olub.
1907-ci ilin mart ayında İsmayıl xan Ziyadxanovun rəhbərliyi ilə Zaqafqaziya Ümummüsəlman İttifaqı yaradılıb. 1917-ci ildə Rusiya fevral burjua inqilabından sonra Gəncədə ictimai təşkilatların icraiyyə komitəsini təşkil edib və şəhər milisinin rəisi təyin edilib.
1918-ci il 18-22 mart tarixlərində komissar Stepan Şaumyanın əmri ilə bolşevik və erməni daşnak ordusu Şamaxıda dinc müsəlmanları qətlə yetirib. Martın 28-də İsmayıl xan Ziyadxanovun rəhbərliyi ilə Şamaxının müdafiəsinə gələn milis dəstələri qısa vaxt ərzində şəhəri düşməndən azad ediblər. Şaumyan İsmayıl xan Ziyadxanovu Azərbaycanda sovet hakimiyyəti üçün ən təhlükəli adam adlandırıb.
İsmayıl xan Ziyadxanov Azərbaycan Xalq Cümhuriyyətinin ikinci hökumətinin tərkibində hərbi işlər üzrə müvəkkil işləyib, daha sonra Xarici İşlər nazirinin birinci müavini təyin edilib.
İsmayıl xan Ziyadxanov 5 may 1920-ci ildə bolşeviklər tərəfindən güllələnib.
