Bu gün Azərbaycan teatr və kino rejissoru, Azərbaycan SSR əməkdar incəsənət xadimi Yusif Məmməd oğlu Bağırovun vəfatından 31 il ötür.
Gencexeber.az məlumat verir ki, Yusif Bağırov 20 yanvar 1924-cü ildə Bakıda anadan olub. 1941-ci ildə Bakı Teatr Texnikumuna daxil olsa da, təhsilini yarımçıq qoyaraq cəbhəyə yollanıb. Müharibədən qayıtdıqdan sonra təhsilini davam etdirib və 1947-ci ildə texnikumu fərqlənmə diplomu ilə bitirib. Daha sonra Azərbaycan Dövlət Teatr İnstitutunun rejissorluq fakültəsində təhsil alıb və 1952-ci ildə məzun olub.
Peşəkar fəaliyyətinin böyük hissəsi Gəncə Dövlət Dram Teatrı ilə bağlı olan rejissor 1952–1956-cı illərdə teatrda quruluşçu rejissor, 1966-cı ildən ömrünün sonunadək isə baş rejissor vəzifəsində çalışıb.
Yusif Bağırov 1956–1966-cı illərdə "Azərbaycanfilm" kinostudiyasında da fəaliyyət göstərib. "Koroğlu", "Kölgələr sürünür", "Əhməd haradadır?" və digər filmlərin ikinci rejissoru olub. O, həmçinin karyerası ərzində 100-dən artıq bədii filmin Azərbaycan dilinə dublyajında iştirak edib.
Rejissor 1959-cu ildə Şəmsi Bədəlbəyli ilə birlikdə Fikrət Əmirovun "Gözün aydın" əsərini Azərbaycan Dövlət Musiqili Komediya Teatrında səhnələşdirib. 1961–1963-cü illərdə isə M. A. Əliyev adına Azərbaycan Dövlət İncəsənət İnstitutunda aktyor sənətindən dərs deyib.
Yusif Bağırov Gəncə Dövlət Dram Teatrında 33 illik fəaliyyəti ərzində yüzlərlə tamaşaya quruluş verib. Onun hazırladığı əsərlər uzun illər teatrın repertuarının əsasını təşkil edib.
Sənətə xidmətlərinə görə 1982-ci ildə "Azərbaycan SSR əməkdar incəsənət xadimi" fəxri adına layiq görülüb.
Yusif Bağırov 15 avqust 1995-ci ildə Gəncədə vəfat edib.
