Rəhim bəy Əlağa oğlu Vəkilov 29 fevral 1897-ci ildə Gəncə qəzasının Yuxarı Salahlı kəndində (indiki Qazax rayonu) anadan olub.
Məktəb illərindən Vəkilov rəssamlığa həvəs göstərirdi, hətta çoxları onu gələcəyin böyük bir rəssamı kimi görürdü. Lakin sonunda Rəhim bəy siyasətçi, Cümhuriyyət parlamentinin ən gənc deputatı kimi tanındı.
1916-cı ildə Realnı məktəbi bitirdikdən sonra 9 saylı rus-tatar məktəbində müəllim kimi fəaliyyətə başlayır və tələbə təşkilatlarında fəal iştirak edir. Burada onun ilk milliyyətçi baxışları formalaşır. Vəkilov 1918-ci ilin əvvəllərində Müsavat partiyasına daxil olur, burada siyasi işlər komissiyasının rəhbəri təyin olunur.
1918-ci il mayın 28-də Tiflis şəhərində “İstiqlal bəyannaməsi”nin mətnini hazırlayan və onu imzalayanlardan biri Rəhim bəy Vəkilov olur. Tiflisdə yeni yaranan dövlətin bütün lazımi işləri görüldükdən sonra hökumət öz fəaliyyətini daha da genişləndirmək üçün iyunun 16-da Gəncəyə köçdü. Burada Vəkilov Milli Şuranın katibi kimi siyasi fəaliyyətini davam etdirdi.
O, 7 dekabr 1918-ci ildə Azərbaycan parlamentində ən gənc deputat olaraq katib seçilir. Parlament debatlarında həmişə fəal iştirak edən Rəhim bəy problemlərlə tanış olmaq məqsədi ilə tez-tez Azərbaycanın müxtəlif bölgələrinə baş çəkir. “1920 il üçün Azərbaycan Respublikasının ünvan təqvimi” kitabında onun “Azərbaycan Respublikasının yaranma tarixi” adlı oçerki çap edilib. Bu, AXC tarixinə dair ilk əsərlərdəndir.
1920-ci ildəki sovet işğalından sonra Rəhim bəy siyasi fəaliyyətini gizli şəkildə davam etdirir. O, 1922-ci ilin sentyabrında savadını artırmaq məqsədi ilə BDU-nun şərqşünaslıq fakültəsinə daxil olur. Bununla yanaşı, Müsavat partiyasının işlərinə də rəhbərlik edir. 1923 və 1926-cı illərdə Vəkilov həbs olunaraq iki dəfə sürgün edilir.
Rəhim bəy Vəkilov SSRİ-nin xüsusi xidmət orqanları tərəfindən təqib edildiyindən 1 mart 1934-cü ildə Kür çayının üzərindəki körpüdə tapança ilə özünü vuraraq intihar edib.
Mənbələr:
Azərbaycan Xalq Cümhuriyyəti ensiklopediyası. Cild II. Bakı-2005
