Gəncədə omnibus nəqliyyat vasitəsi ilk dəfə 1 iyun 1883-cü ildə fəaliyyətə başlayıb.
Gencexeber.az məlumat verir ki, Gəncə şəhərində belə bir nəqliyyat vasitəsinin açılmasına səbəb dəmiryol stansiyasının şəhər mərkəzindən 5 kilometr aralıda yerləşməsi idi. Bununla əlaqədar şəhər əhalisinin çoxsaylı müraciəti nəticəsində nəqliyyat vasitələri nazirliyi öz hesabına yeni nəqliyyat yolunu istifadəyə verir. Daha sonra isə oraya gedən omnibus və konka nəqliyyat vasitələri fəaliyyətə başlayır.
Omnibus Gəncədə iki istiqamətdə hərəkət edirdi və hər istiqamət dəmiryol stansiyasından başlayırdı. Birinci istiqamət Gəncə şəhər mərkəzinə, ikinci isə Hacıkənd qəsəbəsinə gedirdi. Hacıkənd marşrutu Göygöl şəhərindən, Helenendorf koloniyasından keçirdi. Bu marşrut mövsümi xarakter daşıyırdı və yalnız yayda fəaliyyət göstərirdi. Gəncə şəhər mərkəzinə kimi gediş haqqı 20 qəpik, hər pud baqaja görə - 10 qəpik təşkil edirdi. Helenendorfa qədər qiymət 20 qəpik, Hacıkəndə isə 50 qəpik təşkil edirdi və hər pud baqaja 20 qəpik ödənilirdi.
Omnibus çoxoturacaqlı at qüvvəsi ilə hərəkətə gətirilən nəqliyyat olub. Bu, ictimai nəqliyyatın ilk növü idi. Nəqliyyat növü Gəncədən başqa, Azərbaycanın Şəki, Ağstafa, Şuşa, Zaqatala, Yevlax şəhərlərində fəaliyyət göstərirdi. Omnibus XX əsrin əvvəllərində fəaliyyətini dayandırıb.
