Gəncə şəhərində 42 yaşlı kişi eşitmə və nitq qabiliyyəti məhdud olan qıza əxlaqsız hərəkətlər edib.
Teleqraf.аz xəbər verir ki, hadisə ötən il aprelin 22-də şəhərin Depo qəsəbəsində baş verib. 1984-cü il təvəllüdlü Fərid dostu və qonşusu Vəlinin evinə gəlib. O, evdə tək olan eşitmə və nitq qabiliyyəti məhdud olan Səidənin (adlar şərti verilib – red.) köməksiz vəziyyətindən istifadə edib.
Qıza dərəcəsi təyin edilməyən xəsarətlər yetirib, köynəyini boğaz nahiyəsinə qədər qaldıraraq intim hərəkətlər edib. Çarpayının üzərində üzüstə uzadaraq saçlarından tutub, zor tətbiq etməklə onu soyundurub, qeyri-təbii yolla cinsi əlaqədə olub.
Fəridin barəsində Cinayət Məcəlləsinin 150.1-ci maddəsi ilə ittiham elan edilib. Lakin o, ittiham üzrə özünü təqsirli bilməyib. İfadəsində göstərib ki, günorta saat 12-13 radələrində işdən qayıdanda Səidənin yaşadığı evə atası ilə görüşmək üçün gedib: "Amma qızın atası evdə deyildi. Səidə ac olduğunu söylədi, ona şorba alıb verdim. Sonra da oradan getdim".
İş üzrə zərərçəkmiş Səidənin sözlərinə görə, Fərid evlərinə axşam gəlib: "Mənə 5 manat təklif etdi, sinəmdən öpmək istədiyini bildirdi. Razılıq vermədim, pulu da götürmədim. Fərid məni tutaraq yerə yıxdı. Mən qışqırmağa başladım. Fərid paltarımı çıxardı, sinə nahiyəmdən öpməyə başladı. Zorla soyundurduqdan sonra üzü üstə olan zaman mənimlə intim əlaqədə oldu. Təqsirləndirilən şəxsdən şikayətçiyəm, barəsində ən ağır cəza təyin olunmasını istəyirəm".
Cinayət işinə Gəncə Ağır Cinayətlər Məhkəməsində baxılıb. Fərid 6 il 5 ay müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən edilib.
Qeyd edək ki, Fərid bundan əvvəl də məhkum olunub. O, 2021-ci ildə Cinayət Məcəlləsinin 177.2.3-cü (yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla oğurluq törətmək) maddəsi ilə təqsirli bilinib və 1 il 3 ay müddətinə azadlıqdan məhrum edilib.
Ondan əvvəl isə 2020-ci ildə də eyni əmələ görə məhkum edilib.
