Gəncəli şagird beynəlxalq imtahanda ən yüksək nəticəni göstərib.
Gencexeber.az məlumat verir ki, Türkiyə Cümhuriyyəti universitetlərinə əcnəbi tələbələrin qəbulu üçün keçirilən YÖS (Xarici Tələbə İmtahanı) imtahanında Gəncədən olan şagird ən yüksək — 500 bal toplayıb.
Gəncə şəhər Fizika, Riyaziyyat və İnformatika təmayüllü liseyin 11-ci sinif şagirdi Kənan Sadıxov bu möhtəşəm uğura imza atıb. O, imtahanın nəticələrinə görə Türkiyənin bütün universitetləri tərəfindən qəbul olunur.
Qeyd edək ki, YÖS imtahanı 80 sualdan ibarətdir. Bunlardan 40-ı riyaziyyat, 40-ı isə məntiq suallarıdır. İmtahan ÖSYM (Türkiyə Ölçmə, Seçmə və Yerləşdirmə Mərkəzi) tərəfindən təşkil edilir və Azərbaycanda Bakı, Gəncə və Naxçıvan şəhərlərində keçirilir.
