Daxili İşlər Nazirliyinin (DİN) Mətbuat Xidmətinin regional qrupundan Gencexeber.az-a verilən məlumata görə, Gəncə şəhər M.A. Abbaszadə adına 20 nömrəli tam orta məktəbdə şagirdin digər şagird tərəfindən döyülməsi iddiası ilə bağlı polis araşdırmalara başlayıb.
Bildirilib ki, araşdırmanın nəticəsindən asılı olaraq məsələyə hüquqi qiymət veriləcək.
10:29
Xəbər verdiyimiz kimi, Gəncə şəhər M.A. Abbaszadə adına 20 nömrəli tam orta məktəbdə azyaşlı bacılarla bağlı xoşagəlməz hadisələrin baş verdiyi iddia olunub.
Gencexeber.az-a Gəncə-Daşkəsən Regional Təhsil İdarəsindən verilən açıqlamaya görə, qeyd olunan məsələ ilə əlaqədar məktəbdə müvafiq araşdırma aparılıb.
"Araşdırma nəticəsində müəyyən edilib ki, hadisə aprelin 27-də tənəffüs zamanı məktəbin həyətində şagirdlərin bir-birini ehtiyatsızlıqdan itələməsi nəticəsində baş verib. Bununla yanaşı qeyd edirik ki, şagirdlərlə məktəbin psixoloqunun iştirakı ilə fərdi söhbətlər aparılıb, eləcə də məktəblilərin valideynlərinə mövcud vəziyyət ətraflı izah edilib.
Qeyd edirik ki, şagirdlərin sağlamlığı və təhlükəsizliyi daim diqqət mərkəzində saxlanılır", – İdarədən bildirilib.
Xatırladaq ki, redaksiyamıza müraciət edən Çimnaz Məmmədovanın iddiasına görə, 2-ci sinifdə təhsil alan iki qız nəvəsi mütəmadi olaraq 4-cü sinif şagirdi olan qız tərəfindən döyülüb.
