Ermənistan silahlı qüvvələrinin Gəncəni raket atəşinə tutması nəticəsində şəhidlik zirvəsinə ucalan Orxan Xəlillinin doğum günüdür.
Gencexeber.az məlumat verir ki, Orxan Qoşqar oğlu Xəlilli 2009-cu il aprelin 29-da dünyaya göz açıb. O, Gəncə şəhər K.D.Uşinski adına 29 nömrəli tam orta məktəbdə təhsil alıb.
Orxan Xəlilli 2020-ci il oktyabrın 17-də Ermənistan silahlı qüvvələrinin Gəncəni raket atəşinə tutması nəticəsində həyatını itirib. Həmin faciəli hadisə zamanı onun anası Xatirə Qəhrəmanova, bacısı Məryəm Xəlilli və yaxın qohumu Ləman Qəhrəmanova da həlak olublar.
Azərbaycan Respublikası Nazirlər Kabinetinin 1994-cü il 15 yanvar tarixli 10 nömrəli qərarı ilə təsdiq edilmiş "Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları"nda dəyişiklik edilməsi barədə 2020-ci il 20 noyabr tarixli qərara əsasən, həlak olan ailə üzvlərinə və onların qohumuna şəhid statusu verilib. Onlar Gəncə şəhərində yerləşən Şəhidlər Xiyabanında torpağa tapşırılıb.
