Xəbər verdiyimiz kimi, Gəncə şəhərinin 9 nömrəli tam orta məktəbin şagirdi bıçaqlanıb.
Gencexeber.az-a Gəncə-Daşkəsən Regional Təhsil İdarəsindən verilən açıqlamaya görə, aprelin 29-da Gəncə şəhər 9 nömrəli məktəbin iki şagirdi arasında məktəbdənkənar ərazidə mübahisə yaşanıb.
"Mübahisə zamanı şagirdlərdən biri digərinə xəsarət yetirib. Məsələ ilə bağlı hüquq-mühafizə orqanlarına məlumat verilib, hər iki şagirdin valideynləri məktəbə dəvət edilib və onlarla profilaktik söhbət aparılıb. Şagirdlərin fiziki və psixoloji durumu məktəb rəhbərliyi və idarə tərəfindən izlənilir.
Qeyd olunanlarla yanaşı, stressin idarə olunması, sağlam psixoloji mühitin bərpasını təmin etmək üçün məktəb rəhbərliyinə şagirdlər və pedaqoji heyətlə maarifləndirici söhbətlərin aparılması tapşırılıb. Hadisə ilə bağlı hüquq-mühafizə orqanları tərəfindən araşdırma aparılır. Uşaqların yeniyetməlik dövrü olduğunu, araşdırma prosesinin davam etdiyini nəzərə alaraq ictimaiyyətdən də bu mövzuda daha həssas davranmalarını, paylaşımlarda rəsmi qurumların açıqlamalarına istinad etməyi xahiş edirik", – açıqlamada qeyd edilir.
Xatırladaq ki, hadisə zamanı məktəbdə oxuyan 8-ci sinif şagirdi 9-cu sinif şagirdinin döş qəfəsinə bıçaqla zərbə endirib. Zərərçəkən Uşaq Xəstəxanasına hospitalizasiya olunub. Pasiyentə zəruri tibbi xidmətlər göstərilib. Vəziyyəti qənaətbəxş qiymətləndirilən şəxs ambulator müalicə üçün evə buraxılıb.
Faktla bağlı polis tərəfindən araşdırma başlanılıb.
